Tað er áhugavert at síggja hvussu framstandandi miðlafólk, sum arbeiða fyri framstandandi miðlar, sum CNN, BBC, DR og okkara egna KVF, halda lív í óváttaðum og ógrundaðum tíðindum um komandi amerikanska forsetan, Donald Trump

Ein av høvuðsøgunum í miðlunum hesa vikuna, er eitt páhald hjá einum fyrrverandi bretskum fregnartænastumanni, sum eftir áheitan frá einum bólki av Demokratum, kannaði um nakað samband var millum Donald Trump og Russiska forsetan.

Niðurstøðan, hjá fyrrverandi fregnartænastumanninum, var at tríggir persónar, sum høvdu arbeitt fyri Donald Trump í valstríðnum, høvdu persónliga verið á fundi við russisk fregnartænastufólk. Hetta var beinleiðis afturvíst av Donald Trump og umboð fyri Donald Trump kundu leggja fram dokumentatión á tíðindafundinum í vikuni.

Harafturat søgdu somu leysasøgur, at russar høvdu sera følsamar persónligar upplýsingar um komandi amerikanska forsetan.

Amerikanska fregnartænastan avgjørdi eftirfylgjandi at kunna forsetan og Trump um hesa leysasøgurnar. Grundgevingin var m.a. tann at tað var rætt at forsetin og Trump vistu um leysasøgurnar. Síðani hava søgurnar verið endurgivnar, óteljandi ferðir í miðlunum.

Søgan hevur fingið sítt egna lív og stóru og sokallaðu seriøsu miðlahúsini hava alla vikuna endurgivið hvønn annan og leita eftir viðmerkjarum til hesa óváttaðu leysasøgur.  Eisini hevur eitt panel av tungu dreingjunum í CNN, fylgt við hvørjir persónar í skipanini hava vitað um hesa leysasøgurnar.

Søgurnar koyra undir heitinum "unsubstantiated-news" - ella "ó-uppihaldandi", ógrundaðar leysasøgur.

Grundgevingin fyri at bera søgurnar fram, er at tey fólkini sum eru upprunin til søgurnar – sum altso eingin kann vátta – annars plaga at verða álítandi???

Á tíðindafundinum í vikuni, spurdi Donald Trump ein sera viðkomand spurning: Høvdu somu miðlar borið hesi óváttaði tíðindi á henda hátt, um talan ístaðin var um Obama.

Trump gleddist annars um at fleir av stóru miðlunum hava valt ikki at bera søgurnar m.a. New York Times, sum annars er kent fyri ikki at stuðla Trump.