Løgmaður bjóðar ikki Trump og Putin til Føroya
Hóast løgmaður heldur hugskotið vera bæði áhugavert og stórætlað, so fer hann ikki at fylgja áheitanini frá Miðflokkinum um at bjóða Donaldi Trump og Vladimiri Putin til Føroya at halda fund.
Hóast løgmaður heldur hugskotið vera bæði áhugavert og stórætlað, so fer hann ikki at fylgja áheitanini frá Miðflokkinum um at bjóða Donaldi Trump og Vladimiri Putin til Føroya at halda fund.
Løgmaður er samdur við Miðflokkinum, sum heldur at Føroyar eru sera væl egnaðar til at hýsa størri útlendskum vitjanum, altjóða ráðstevnum og fundum.
“Ein tílíkur fundur millum ríkisovastar vildi sett Føroyar á heimskortið, og eg eri samdur í, at vit skulu halda fram við at menna okkara førleikar og royndi á økinum við at skipa fyri tiltøkum í Føroyum og bjóða fólki henda vegin,” sigur Løgmaður.
Kortini staðfestir hann, at tað verða ríkisovastarnir í USA og Russlandi, sum gera av, um og hvar teir ætla at hittast.
“Landsstýrið fer ikki av sínum eintingum at taka serstøk stig fyri at fáa slíkan toppfund til Føroya,” sigur Aksel V. Johannesen, løgmaður í svari til Miðflokkin.