Gera gjøldur við avlurtingini hjá Trump
Leiðandi ráðgevin í Hvítu Húsunum, Kellyanne Conway, segði í eini viðmerking um avlurtingina, sum Donald Trump sjálvur pástendur er gjørd av honum, at hon kann vera hend umvegis ein mikrobylgjuovn. Tað skuldi ráðgevin ikki havt sagt, tí nú yðja sosialu miðlarnir við skemtiligum myndum av mikrobylgjuovnum.
”Tað ber til at avlurta fólk umvegis telefonina, og sjálvandi eisini umvegis sjónvarpstól. Tað finnast rættiliga nógvir mátar, millum annað ber til at umbyggja mikrobylgjuovnar til upptøkutól,” segði Kellyanne Conway í eini samrøðu við New Jerseys Bergen County Record.
Hóast ráðgevin stutta tíð eftir samrøðuna boðaði frá, at tey ikki halda, at tað var ein mikrobylgjuovnur, sum var nýttur til avlurtingina, so eru sosialu miðlarnir náðileysir, og sum myndirnar vísa, so er hugflogið eisini stórt.