Skrið í morgin
Tað fer at vera fitt av vindi í morgin. Vindurin fer at veksa eitt sindur í nátt, og tá ið fólk fer til arbeiðis um 8-tíðina í morgin, er vindferðin komin upp í 15 til 20 m/s úr landsynningi.
Tað fer at regna í nátt. Regnumráðið nærkast av vestri, so tað fer fyrst at regna í Vágum. Tað verður um 6-7 tíðina. Klokkan 8 regnar í øllum landinum – mesta regnið vestanfyri.
Á middegi fer at minka við regninum – tað fer ikki at slíta í, men onkur turr løta uppií. Samstundis fer ættin niður í landsynning-sunnan, og vindferðin fer at minka. Um nátturðatíð er vindferðin komin niður í 7 til 12 m/s.
Týsdagin fer vindurin ikki at vera líka nógvur, og heldur ikki líka nógv regn. Ættin fer at liggja úr landsynningi-suðuri, vindferðin um 7 til 12 m/s, turt í løtum, men eisini regn. Serliga eina løtu báðumegin middag.