Laksaprísurin er í dag niðanfyri tríati krónur pr. kilo og so lágur hevur hann ikki verið seinastu seks árini.

Undanfarna samgonga ásetti eitt sokallað ”Tøkugjald” sum er eitt mánaðarligt miðal prosenttal, sum verður roknað eftir miðal mánaðarliga ”altjóða” (RED: Norska) marknaðarar kiloprísinum á laksi.
 
Brot úr lógartekstinum:
Stk. 4. 1) 2) Gjaldið verður ásett soleiðis:
1)   Er miðal altjóða marknaðarprísurin kr. 36 fyri kilo ella hægri, er gjaldið 5%.
2)   Er miðal altjóða marknaðarprísurin kr. 32 fyri kilo ella hægri, men lægri enn kr. 36 fyri kilo, er gjaldið 2,5%.
3)   Er miðal altjóða marknaðarprísurin lægri enn kr. 32 fyri kilo, er gjaldið 0,5%.

 
Marknaðarprísurin fyri laks er í løtuni einans kr. 29,89.
 
Hetta merkir at tøkugjaldi kann minka úr 5% pr. kg. heilt niður í 0,5 % pr. kg. tá Gjaldstovan skal senda alifeløgunum rokning fyri septembermánaða.
 
Miðalinntøkur hjá landskassanum pr. mánað sambart landsroknskapunum seinastu trý árini:
157,9 mió. kr. í 2016 (ímiðal kr. 13,4 mió. pr. mánað)
158,1 mió. kr. í 2017 (ímiðal kr. 13,2 mió. pr. mánað)
136,4, mió. kr. í 2018 (ímiðal kr. 11,4 mió. pr. mánað)
  
Í ár vantar fíggjarmálaráðið at inntøkurnar frá tøkugjaldinum hjá alivinnuni verða 140 mió. kr.. Men komandi ár vantar fíggjarmálaráðið at fáa 154 mió. kr.  inn frá alivinnuni og greinarar meta at prísurin á aldum laksi fer at hækka aftur.