Trettandi við nógvum vindi
Nú er klokkan 18 – á trettanda.
Nógvur vindur hevur verið í dag. Luftin er komin úr einum hátrýsti við Asorurnar í miðjum Norðuratlantshavi, og hon hevur skundað sær til miðjuna á einum lágtrýsti, sum hevur flutt seg í ein landnyrðing úr Íslandi.
Ættin hevur tí verið sunnan í morgun og útsynningur seinnapartin. Ættin hevur broytt seg, sum lágtrýstið hevur flutt seg.
Mesti vindurin í dag er máldur í Mykineshólmi. Har fór miðalvindurin upp um 25 m/s tíðliga í morgin, og hann er enn oman fyri 30 m/s har vestri. Ættin har hevur verið útsynningur í morgun og seinnapartin. Nú er hon farin upp til lágan vestan.
Minsti vindurin í dag er máldur á Kirkju. Har hevur miðalvindur verið ójavnur – hevur ligið ímillum 11 og 16 m/s allan dag – upp og niður, einki mynstur. Ættin á Kirkju hevur verið sunnan fyrrapartin, men beint eftir døgurða fór hon upp í lága vesturætt.
Tað stórur munur í veðrinum, tá ið miðalvindurin er 11 til 16 m/s og tá ið hann er oman fyri 30 m/s. Líka so ójavnt hevur veðrið verið kring landið í dag.
Mátingarnar hjá Vørn kunnu síggjast á www.vedrid.fo