Býttu stigini
Sum væntað, bleiv tað til ein spennandi dyst, tá Stjørnan og StÍF í kvøld leiktu í KÍ-høllini. Fyrstu 10 min. gekk javnt á, men so hevði Stjørnan hug at taka leiðsluna. Tá hálvleikurin var hálvrunnin, hevði Stjørnan eina leiðslu uppá trý mál, og tað helt til hálvleiks. Hálvleiksstøðan var 15-12 til Stjørnuna.
Stjørnan byrjaði betur í seinna hálvleiki, og fekk fyrstu 5 min. økt um leiðsluna til fimm mál, men so steðgaði upp við málskjótingini hjá heimaliðnum, tað var ikki tí, at møguleikarnir ikki vóru til at skora. Ferð eftir ferð blivu upplagdir málmøguleikar missnýttir, og tað bleiv straffað við skjótum mótálopum frá StÍF. Tá 17 min. vóru leiktir, hevði StÍF tikið leiðsluna, støðan var tá 21-22 til StÍF. StÍF fekk økt um leiðsluna til trý mál, men seinastu løtuna eydnaðist Stjørnuni at svara aftur, soleiðis at endaliga úrslitið gjørdist javnleikur 25-25.