Nýggjasta línuskipið í føroyska línuflotanum, Klakkur hjá Sp/f Undir Klakki í Klaksvík, hevur roynst væl á sínum fyrsta túri undir føroyskum flaggi. Tey seks føroyski línuskipini, sum royna á Flemish Kap í løtuni, byrjaðu at fiska 22. ella 23. januar.

Klakkur, sum er 10 áa gamalt skip, er millum 12 og 20 ár yngri enn hini føroysku frystilínuskipini á Flemish Kap. Hann klárar m.a. at frysta væl meir enn hini skipini um døgnið, og tað munar væl, tá fiskiskapurin er góður. Sambært yvirliti hjá Vørn, sum Norðlýsið hevur fingið í dag, so hevði Klakkur fiskað væl meira enn hini skipini á midnátt. Klakkur hevði tá fiskað 416,4 tons í rundum, meðan øll hini skipini lógu millum 250 og 272 tons í rundum. Øll veiðan hjá øllum skipum er toskur. Flestu skipini avhøvda fiskin og tá skulu vit býta nøgdina í rundum við 1,5, sum er faktorurin, ið brúktur verður, tá fiskurin er avhøvdaður. Tá svara 416,4 tons av rundum hjá Klakki til 277,6 tons av avhøvdaðum. Klakkur lastar 370 tons, harav 340 tons eru á plattum.

Klakkur og Jógvan I hava eisini møguleikan at skera til flak, og tá er faktorurin nakað væl hægri og sum skilst hava tey nakað av flaki hendan túrin. Sí veiðutølini í rundum á midnátt millum 2. og 3. februar niðanfyri. Á midnátt vóru 1714,4 tons av kvotuni á 1907 tonsum fiskað. Sostatt fara føroysku línuskipini væntandi at sigla heim í vikuni.