Leygardagin bleiv FM í Lendisrenning hildið í Hoydølum. Hetta var samstundis 5. umfar í BETRI Vetrarkappingini 2019/20. Hetta var 17. ferðin at kappast verður í FM í Lendisrenning, sum bleiv hildið á "Stovugólvinum" omanfyri Svangaskarð á Toftum frá 2004 til 2010. Eftir tað flutti tiltakið til Havnar og er hetta sostatt 10. ferðin at FM í Lendisrenning verður runnið í Hoydølum. 60 luttakarar vóru við og rennast skuldu seks umfør á umleið 1,3 km. Børnini runnu tvey umfør.

Maria Biskopstø úr Treysti, sum hevur vunnið tey trý undanfarnu umførini í vetrarkappingini, og sum fyri fyrstu ferð luttók í kvinnubólkinum í Lendisrenning, gjørdi bart og lat ongan iva verða um hvar FM-heitið skuldi. Hon legði seg á odda frá byrjan og munurin øktist spakuliga allan teinin, so hon at enda vann ein tryggan sigur. Nummar tvey bleiv Ann-Mari av Skarði úr Bragdinum, meðan veteranurin Rigmor N. Arge bleiv nummar trý. Maria vann eisini kvinnuunglingabólkin.

Hon hevur nú fýra av fimm sigrum í vetrarkappingini.Hon var ikki við í fyrsta umfarinum Runt Agnið. Flott av Mariu, sum er spurt/miðteinarennari at gera seg galdandi á longru teinunum eisini. Hon fyrireikar seg til DMU innandura um mánaðarskiftið, har hon skal renna 200m, 400m og 800m.

Hjá monnunum gjørdist Signar B. Røsvik úr Bragdinum tryggur vinnari, frammanfyri Eirik Hansen úr Bragdinum og Helga W. Olsen.

Íalt bleiv tað til fýra gull-, tvey silvur og tvey bronsuheiðursmerkir til Treysti. Borgar Biskopstø gjørdist nummar trý í superveteranbólkinum. Karin K. Petersen bleiv nummar tvey hjá superveterankvinnunum. Gunnar Simonsen vann bólkin fyri ultraveteranar.

Vibeka Sivertsen vann gentubólkin, meðan Tabita Hvannastein bleiv nummar tvey. Christian S. Andreasen gjørdist nummar trý í dreingjabólkinum.

Leinkja til innslag í 3-2 hjá Kringvarpinum er at finna her: Maria og Signar føroyameistarar í lendisrenning