Lýsing
Lýsing

Hetta er at avtaka Klaksvíkar Sjúkrahús!

SKRIVAÐ: Jógvan Skorheim, borgarstjóri  |  18.02.2020 - 13:46 Politikkur Tíðindaskriv

Tað er toppmált frekt og arrogant av landsstýrismanninum í heilsumálum, tá hann sigur við Kringvarp Føroya, at hann ikki sær tað sum eitt politiskt mál, at stjórin fyri Klaksvíkar Sjúkrahús í gjár fekk bræv frá hansara egnu umsiting um, at hon ikki longur hevur fíggjarligar stjóraheimildir fyri sín egna stovn, men at stjórin á LS nú er stovnsleiðari fyri KS – og enn verri verður tað av, at hetta gongur beint ímóti tí, sum hansara arbeiðsgevari, Føroya Løgting, hevur samtykt. Okkara umboð í løgtinginum eru tey einastu, sum kunnu steðga hesi niðurlaging av Klaksvíkar Sjúkrahúsi, og tað bæði vænta og krevja vit av teimum!

Í seinasta valskeiði feldi Føroya Løgting tilmælið frá umsitingini hjá Kaj Leo Holm Johannesen, landsstýrismanni, um at Klaksvíkar Sjúkrahús og Suðuroyar Sjúkrahús bara skuldu hava varastjórar.

Tá sló Føroya Løgting fast við sjey-tumma seymi, at t.d. Klaksvíkar Sjúkrahús, skuldi hava sína egnu játtan og sín egna stjóra, sum hevur stjóraábyrgd av sínum stovni – sjálvandi.

Tá løgtingið hevur felt eina ætlan um at avtaka stjórastørvini á KS og SS og hevur sligið fast, at har SKULU vera stjórar á hesum stovnum, og at hesir skulu hava sína egnu játtan á fíggjarløgtingslógini, so er tað ikki ein umsitingarligur spurningur, um løgtingslógin skal fylgjast.

Fyrsta og fremsta uppgávan hjá løgmanni og landsstýrinum er nevniliga at útinna tær lógir og samtyktir, sum Føroya Løgting áleggur teimum.

Tað er tí eitt  politiskt álvarsmál, at landsstýrismaðurin svíkur, og ógvuliga arrogant sigur við almenna kringvarpið, at hetta, sum løgtingið hevur samtykt, ikki er hansara borð, men er eitt umsitingarligt og tekniskt mál, sum hansara aðalstjóri skal taka sær av. Við øðrum orðum heldur hesin landsstýrismaðurin, at hann hevur sjálvur onga ábyrgd av at tryggja, at tað, sum løgtingið áleggur honum at útinna, verður hildið og framt í verki.

Eg havi ikki orð fyri, hvussu grundleggjandi hetta álopið er á okkara fólkaræðisligu skipan, tí lata okkara løgtingslimir hetta sleppa snikkaleyst aftur við borðinum, so er tað ikki longur fólkavalda Føroya Løgting, sum er hægsti myndugleiki í landi okkara, og tað er heldur ikki landsstýrismaðurin,  sum løgtingið, umvegis løgmann, hevur sett – nei, tað er umsitingin undir honum, sum bestemmar!

Núverandi landstýrissamgonga hevur í løtuni fýra umboð á  Føroya Løgtingi, sum nú eru tey einastu, ið kunnu steðga tí, sum nú fer fram í landsstýrinum undir leiðslu av einum landsstýri, sum teir eru parlamentariska grundarlagið undir.

Eg fari at takka Alexandru á Dul, sjúkrahússtjóra á Klaksvíkar Sjúkrahúsi, at hon so neyvt setti orð á hvørja støðu Klaksvíkar Sjúkrahús er komið í, í útvarpstíðindunum á miðdegi. Eg havi merkt eldhugan og framfýsni seinastu tíðina frá leiðsluni á KS, og tað mugu vit halda fast við og geva bestu gróðrarlíkindi fyri. Tað er nú ting skulu útbyggjast og mennast!

Sum borgarstjóri í Klaksvíkar kommunu átali eg harðliga hesa framferð, sum – umframt politiska leikin – eisini er eitt grundleggjandi álop á Klaksvíkar Sjúkrahúsi. At taka fíggjaramboðið frá stjóranum, er tað sama sum at avtaka Klaksvíkar Sjúkrahús. Ein heimild, sum evsta vald í landinum, Føroya Løgting, hevur samtykt at verja, og nú landsstýrismaðurin svíkur sínar politisku skyldur, flytir ábyrgdin av hesum álvarsmáli uppaftur til okkara umboð á Føroya Løgtingi.

Hetta mugu tit, norðoya løgtingslimir, ikki lata henda!

 

Klaksvík, 18. februar 2020

Jógvan Skorheim

Borgarstjóri

 

Lýsing
Seinastu tíðindini
Jákup B. Andreasen kann skjótt blíva klá…
Requiem í Varpinum skírisdag
Ein heimskendur hándverkari! 
Framsýning á Viðareiði á páskum - Undir…
Sangkórið og Jógvan Mortensen syngja í B…
Áhugaverdur djóragarður í Kunoy
Aðalfundir og lagnusøgur á Krígssavninum
Meistarar og lærisvei­nar í Gøtu
Fyrsta Reyða Kross Summarlegan
Pengar fyri bøtur úr Føroyum eiga at far…
Klaksvík kosið millum vakrastu býir í he…
Mass Hoydal leiðari fyri Visit Runavík
Svimji­høllin um Páska­høgtíðina
Frá Melodi Grand Prix til FríðuTónar
Hiddenfjord fingið altjóða góðkenning fy…
Stór ungdóms­páskastevna í Havn um vikusk…
Uni Holm Johannsen: - Tann fyrsta breið…
Stór listaframsýning við Løkin
Grundøki til sølu Undir Gerðhamri í Hvan…
Danmark hevði munin