Lýsing
Lýsing
Ein rørdur Poul Michelsen á tingsins røðarapalli í dag, tá hann segði løgtinssessin frá sær | Mynd: kvf.fo

Virkin Havnarmaður gevst í politikki

SKRIVAÐ: Jóhann Lützen  |  06.03.2020 - 15:07 Leiðarin Politikkur

Poul Michelsen, sum altíð hevur verið ungdómmiligur hóast sín høga aldur, gevst nú í politikki. Á tingfundi, umleið á miðdegi, boðaði hann frá á Løgtingsins røðarapalli, at hann gevst í politikki. Handlikraftigur, sum Poul eisini er kendur fyri at vera, boðaði hann eisini frá, at flokkurin longu hevur valt ein eftirfylgjara, og fær sum tann einasti flokkurin ein forkvinnu í Ruth Vang.

Tað var á heysti í fjør, at Poul Michelsen var úti fyri eini skelkandi hending uttanlands, har hann føldi seg illa og fór í svart, so at siga. Eftir drúgva sjúkralegu kom hann fyri seg aftur og greiddi frá tilburðinum í miðlunum. Og í dag staðfesti hann so, sáttliga og virðiliga, at aldurin loksins hevði innheintað hendan unglingan í sinninum.

Næst eftir politikkinum er Poul Michelsen kendur frá ítróttini. Poul hevur verið føroyameistari í borðtennis og í heili 9 ár var Poul Michelsen føroyameistari í badminton (1966-1974, bæði árini í roknað), og í fótbóltinum var hann við á minniliga HB-liðnum sum í 1971 breyt drúgvu sigursrøðina hjá 66-liðnum hjá KÍ. Avgerandi dysturin endaði 2-1, og Poul Michelsen skeyt bæði málini. Neyvan eru nógvar løtur, ið standa sterkari í minninum hjá havnarmanninum.

Tí Poul Michelsen er Havnarmaður við stóra H. Í 12 ár var hann borgarstjóri í Tórshavnar Kommunu, og í 2014 gjørdist hann heiðurslimur í Havnar Bóltfelag. Hann er tó ikki heilt fyriuttan avbygdarílegur. Mamma Poul æt Paula Sundberg og kemur úr bygdini Nes eystanfyri Vág í Suðuroynni.

Men spyrt tú Poul sjálvan, so er tað helst sum vinnulívsmann, at hann identifiserar seg. PM-fyritøkan byrjaði sum ein lítil kjallarafyritøka í 1974 í egnum kjallara. Á 40-ára degnum var fyritøkan vaksin til eina stóra fyritøku eftir føroyskum mátistokki við umleið 180 fulltíðarstarvsfólkum, herav knapt helvtin starvast á heilsøluni. Undir sama hatti er Atlantic Flutningur, ið sum navnið sigur er ein flutningsfyritøka.

Tá vit nú minnast Poul Michelsen, so er tað politikaran Poul Michelsen, vit minnast. Tí sum skilst á øllum brøgdum, heldur hann á við sama áræði við síni fyritøku. Sum politikari er Poul fólkafloksmaður av uppruna, men fyrst og fremst liberalur tjóðskaparmaður. Tá Poul ikki longur helt, at Fólkaflokkurin var ein liberalur tjóðskaparflokkur, tók hann avleiðingarnar, meldaði seg úr flokkinum og stovnaði sín egna flokk saman við øðrum kreftum sum eitt nú Honnu Jensen, eisini úr Fólkaflokkinum, og Tróndi Djurhuus.

Í 2015 eydnaðist Framsókn at koma í stjórn, og Poul Michelsen bleiv floksins fyrsti landsstýrismaður, har hann umsat vinnu- og uttanríkismál. Poul var líka aktivur á báðum økjum og fór beint í holt við at liberalisera vinnulóggávu og við at knýta sambond út í heim. M.a. stóð hann fyri fríhandilsavtalu við Turkaland og ruddaði slóð fyri sendistovuni í Kina.

Partapolitiskt samdur ella ósamdur við Poul Michelsen, so kann ongin taka frá honum, at hann hevur talst millum teir virknastu politikararnar, Føroyar hava havt. Tá tíðin nú innheintaði hann, kann Poul hyggja aftur á eitt sera virkið og úrslitaríkt politiskt lív, og sjálvt har tað ikki eydnaðist at røkka úrslitunum, kann hann ivaleyst vera nøgdur við sín egna innsats, tí parturin hjá Poul hevur ongantíð verið tann, ið lá eftir.

Lýsing
Seinastu tíðindini
(Korana-kreppa) Útróðrarbátar­nir eru giv…
Løgtings­fundur í morgin
Hjálparpakki 2 lagdur fram
Fólka­pensjonistar sjúkradagpening og ísk…
Byrja við Føroya Løgtingi
Nótaskip stuðla verkætlan­ina hjá Pál Wei…
MEST gjørt sáttmála við MINESTO í samban…
Nú mugu vit halda fast
Bakkafrost: Frágreiðing frá nevndarforma…
Lands­stýrið kann køva sunnar fyritøkur
Brimil á venjingarferð á Borðoyarvík
Yvirlitstroling á føroyska landgrunni­num…
Hjálparpakki 2 skal styrkja vinnulívið
Skiftandi veðurlag
Norð­urlendskir heilsu- og almanna­málaráð…
179 føroyingar fingið staðfest smittuna
Kalt aftur í dag
Eigarar­nir á Borðoyarnesi trúgva uppá fr…
Í hesum corona døgum
Betri letur 200.000 kr. til Reyða Kross…