Lesari hevur vent sær til Norðlýsið við einum kontoavriti, ið sigur, at hevur hann meira enn 50.000 innistandandi, verður tað negativt rentað við ÷0,75%. Umframt tað stendur, at hann skal gjalda kr. 20,- um mánaðin (!) fyri í heila tikið at sleppa at hava konto. Ein órørd konto við 400 krónum inni verður sostatt tømd heilt uppá 20 mánaðir og fer eftir tað í trot – sum aftur kostar eina uppaftur fúlari rentu uppá 18,75%. Eisini hóast bankin sjálvur hevur skapt trotið.

Fyri fáum døgum síðani hoyrdu vit, at Betri Banki læt aftur fleiri heviautomatir kring landið, og hækkaði kostnaðin fyri at kunna taka út úr teimum til 8 krónur pr. útgjald. Frammanundan hevur sami bankin latið eina røð av avgreiðsludeildum aftur kring landið, til dømis í Vestmanna, Fuglafirði og við Gøtugjógv. Í Fuglafirði gjørdi kommunustýrið ikki mætari enn at flyta øll síni bankaviðurskifti yvir í Norðoya Sparikassa av tí sama.

Á Skála gjørdu tey bart og mótmæla, at einasta sjálvtøkan í bygdini er millum tær, sum nú letur aftur. Frammanundan er bankadeildin har eisini afturlatin. Tey handilsrekandi stúra nú fyri, at tey skulu gera arbeiðið hjá bankunum fyri bankarnar, við tað at fólk koma og biðja um at fáa upphæddir yvir keypsprísin frá teimum í staðin.

Í útjaðaranum merkja tey eisini sviðan av teimum alsamt vaksandi krøvunum til profitt hjá bankunum. Vit hava sæð sjónvarps- og útvarpsinnsløg, har kommunustýrislimir í útjaðara-kommunum kæra sína neyð um, at peningastovnarnar ikki vilja fíggja bústaðir har, hóast teir fáa alt aftur við rentum. Søgur eru farnar at ganga um, at fólk hava fingið noktað lán til hús á bygd, men fáa játtað lán til hús í Havn, hóast síðstnevndu eru nógv dýrari. Og markið fyri, nær ein skal gjalda negativa rentu, minkar eftir øllum at døma sera skjótt.

Vit eftirlýsa samfelagssinni! Tveir av føroysku bankunum eru bara til, tí landskassin og statskassin hava bjargað teimum eftir húsagangir. Á hvørjum ári eru vit eisini vitni til, at stóru bankarnir kunngera tvísiffrað milliónaavlop av sínum virksemi. Og tað almenna ger bankunum eina risastóra tænastu við við lóg at krevja, at allar okkara lønir skulu ígjøgnum ein banka at venda, áðrenn vit fáa tær útgoldnar. Nakað sum onkur teirra nú krevur 20 krónur fyri um mánaðin frá kundunum. Vit mugu kunna fáa okkurt afturfyri!

Røddir hava verið frammi um, at vit áttu at havt ein almennan banka, ið ikki hevði profittáhugamálið sum sítt einasta áhugamál. Hann kundi so veitt sethúsalán til hús á bygd og havt bankatænastur kring landið, sum privatu bankarnir so treyðugt vilja veita, men sum stórur eftirspurningur er eftir. Miðflokkurin róði fram undir hesa loysnina undir valstríðnum, men hevur enn ikki meiriluta fyri tí.

Hetta er sjálvandi ikki ein ynskisstøða, men kann gerast neyðugt, um ikki bankarnir taka annað skinn um bank og byrja at vísa samfelagssinni. Vit kunnu ikki liva við alsamt øktum avgjøldum fyri alsamt meira skerda tænastu, og nú eru vit komin at pínumarkinum.