Eisini føroysk ferðandi kunnu brúka tilboðið í Danmark, og til ber at siga, at so er ongin trupulleiki, tí so er ongin orsøk at verða kannað/ur eina ferð afturat í Vágum. Men danska tilboðið vendir sær fyrst og fremst til danir. Hevur tú NemID, fært tú sum dani úrslitið innanfyri 1-2 dagar á sundhed.dk. Útlendingar, og føroyingar uttan NemID eru umfataðir av tí sama sum teir, fáa hinvegin bara svar 2 dagar seinni, um kanningarúrslitið er positivt.

Tað er heldur ikki greitt enn, um føroysku myndugleikarnir góðtaka donsku kanningina, sum føroyingar sum sagt hava møguleika at taka áðrenn heimferðina til Føroya. Skal svarið fyriliggja, tá tann ferðandi kemur aftur til Føroya, má kanningin takast 1-2 dagar frammanundan, eins og tað er eitt sindur tvørligt, tá man ikki hevur skjalprógv uppá eitt negativt úrslit.

Mong fólk í Føroyum undrast á, hví teir við tvingsli skulu gjalda til privatar fyritøkur sum Thetis og Amplexa í Vágum ella Hirtshals, tá danir kunnu kannast av almennu myndugleikunum sjálvboðið og ókeypis. Um tað er ov dýrt fyri almennu Føroyar at kanna føroyingar ókeypis, hví so ikki fara í samstarv við danir um at lata føroyingar brúka tilboðini í Danmark, haðani nógv tann størsti parturin av teimum ferðandi koma?

Eitt negativt, sjálvboðið, alment og ókeypis kanningarúrslit, tikið stutt undan fráferð úr Danmark til Føroya, átti at verið nøktandi. Í øllum førum er møguleikin verdur at kanna.