Tað vóru umboð fyri Team Klaksvík, Klaksvíkar Badmintonfelag, Klaksvíkar Fimleikafelag, Mjølnir, Hávur sum møttu á fundinum. 

Á fundinum vórðu ymisk viðurskifti umrødd og venjingartímarnir fyltu nógv. Sum heild vóru feløgini nøgd við tímarnar, men tað skerst ikki burtur, at gott hevði verið við eini høll aftrat. 

Nú skúlin er liðugur fara fyribils skúlastovurnar, at verða tøkar hjá feløgunum. Eftir øllum at døma fær Stjørnan tí einu stovuna til nýtt felagshøli og kurvabóltfelagið Hávur fer møguliga inn í gamla Stjørnurúmið. Feløgini vórðu øll samd um, at hinar báðar stovurnar eiga at verða riknar eins og hæddin omanfyri, tvs. felagshølir hjá øllum at nýta, sum Klaksvíkar Ítróttardepil umsitur. 

Útgerðin í hallunum varð eisini umrødd. Í Badmintonhøllini fara lofts-skinnararnir til netini at verða skiftir og nú Snallabjalla fer út úr hølinum í suðurendanum, er ætlanin at hølið skal nýtast til felags fitness rúm til feløgini at nýta.