Grønland finnur seg ikki í tí – Føroyar gera onki
Longu tá fundurin fyri norðurlendsku verjumálaráðharrarnar var í Føroyum, prutlaði undir lokinum í Grønlandi. Svenska umboðið læt á tí fundunum ongan iva vera um, at Føroyar og Grønland ikki sluppu at gerast limir í Norðurlandaráðnum. Tað nervaði ikki Høgna Hoydal, landsstýrismann í uttanríkismálum, sum smílandi fekk tikið eina “familjumynd” saman við teimum, sum ikki ynskja okkum til lim. Grønland var hinvegin firtið og tað av røttum, og nú var bikarið so fult hjá stjórnini hjá Múte B. Egede.
Føroya Landsstýri bjóðaði herfyri, vegna donsku stjórnina, norðurlendsku verjumálaráðharrunum til Føroya at fundast, og í Norðurlandahúsinum slapp svenska Jessika Roswall at fortelja øllum Føroya fólki gjøgnum KvF, at Føroyar, Grønland og Åland ikki vórðu ynskt sum fullgildigir limir í Norðurlandaráðnum. Tað er so ein erlig søk, og tað løgna er ikki støðan hjá svenska ráðharranum. Tað løgna er, at Føroya Landsstýri góðtekur tað, enntá smílandi.
Síðani er enn eitt skot komið fyri bógvin úr Svøríki. Føroyar, Åland og Grønland eru ikki vælkomin á summarfundin hjá norðurlendsku stjórnarleiðarunum nú í mai, ljóða boðini úr Stockholm. Men enn sum áður tekur Føroya Landsstýri teimum tað ikki illa upp, bukkar og góðtekur (og møguliga aftur smílandi?). Grønland noktar hinvegin at finna seg í at verða tilsíðissett enn eina ferð, og hevur boðað frá, at tey fyribils taka seg úr stjórnarsamstarvinum í Norðurlandaráðnum.
Føroysku umboðini í Norðurlandaráðnum, Johan Dahl úr Sambandsflokkinum og Erling Eidesgaard úr Tjóðveldi, hava sagt sína meining um tað og krevja, at Landsstýrið tekur somu avgerð. Men úr Landsstýrinum frættu vit frá Bjarna Kárasyni Petersen, at ætlanin er at bíða til í fyrsta lagi í heyst. Og ikki við at gera nakað – nei, tástani skulu vit fara at umhugsa tað.
Í Degi og Viku týskvøldið greiddi løgmaður frá, at tey hava vitað tað síðani fyrst í februar, at vit ikki fóru at verða boðin til fundin nú í mai. Men hann endurtók bara boðskapin frá sínum landsstýrismanni um, at onki hendir fyrrenn í heyst, og sjálvt tá hendir onki ítøkiligt – vit skulu tástani umhugsa okkara støðu.
Í Grønlandi tykist sostatt ein sjálvræðisneisti at vera kyknaður, sum vit mugu 20 ár aftur í tíðina fyri at finna í Føroyum. Tá køvdist neistin, tí fyrrverandi loysingarhetjurnar gjørdust livibreyðspolitikarar burturav, meðan grønlendskir politikarar nú eru farnir at sláa nevan í borðið og krevja at verða tiknir fyri fult. Londini býttu um pláss á sjálvræðiskós, og Grønland hevur síðani yvirhálað Føroyar.
Og við verandi landsstýrisfólkum er ongin vón fyri, at vit fara at fáa Grønland aftur.