Í Klaksvík verður alt fyrireikað sum um at dystur verður leiktur í kvøld. Men fyrireikingarnar eru annars heilt óvanligar, tí støðan er so óviss bara fáar tímar undan dystarbyrjan. 

Kl. 10.00 fóru umboð fyri KÍ, Slovan Bratislava og UEFA á tekniskan fund í Klaksvík, sum vanligt er á dystardegnum.

So leingi sum eingi boð eru komin, so er framvegis galdandi, at dysturin verður kl. 17.00 í dag. Men Norðlýsið skrivaði fyrr í morgun, at ein leikari hjá Slovan Bratislava var kannaður positivur fyri koronu í gjár. Landslæknin sigur við Norðlýsið, at tað ganga 2-3 tímar áðrenn nøkur útmelding kemur og aðrar keldur hjá Norðlýsinum siga, at ein niðurstøða fyriliggur kl. 12.00.

Eitt er, at ein leikari møguliga hevur fingið staðfest smittuna, um nýggja royndin vísir tað sama. Nakað annað er, at virkin smitta hevur verið í hópinum líka síðani leygardagin(fýra fólk eru higartil staðfest við koronu) og at leikarar eru við á ferðini, sum spældu dystin leygardagin, har mótstøðuliðið í Slovakia bleiv koyrt í sóttarhald og heimliga kappingin steðgað.

Norðlýsið fylgir gongdini.