Odmar hevur verið ein lyklaleikari hjá KÍ í ár. Í sínum 18 landskappingardystum hevur KÍ bara latið 12 mál ígjøgnum. Í síðstu 8 dystunum er bara eitt mál farið ígjøgnum. Tí er tað ein smeitur fyri KÍ, um landsliðsleikarin í miðverjuni nú má sita uttanfyri.
- Knæið er hovið og er stívnað nú, so eg havi rættiligani nógva pínu enn. Tað hendi, tá ein leikari hjá TB kastaði seg í eina málroynd inni í okkara felti, og eg stóð stillur og vardi fyri, so hann fór sendandi inn í meg, og eg stóð eitt sindur fastur í vøllinum og fekk ikki flutt meg. Vit mugu meta um støðuna og hvussu tað er í morgin, so bara taka tað sum tað kemur, sigur Odmar Færø við Norðlýsið í kvøld.

Sostatt bendur kanska mest á, at Odmar ikki verður við til Europa League dystin móti Dinamo Tbilisi hóskvøldið, tó at leikarin sjálvur ikki enn vil avskriva tað. Frammanundan er greitt, at Abubakar Ibrahim Aliyu ikki verður partur av hópinum hjá KÍ, fyribils í 14 dagar. Sum Norðlýsið skilir, so er tað vegna disiplin trupulleikar.