Á Føroya Sjómannadegi 16. august í 2013, var Kristina í Króki Eliasen umborð á Brimli við tá tvey ára gomlu dóttir síni Petru í Króki Eliasen. Hetta var aftaná fiskikappingina á Kósini, tá Føroya Sjómannadagur bjóðaði børnunum umborð á skip, ið sigldu yvir á Kalsoyarfjørð, har tey kundu kasta ein fløskupost.

Tá tvey ára gamla Petra kastaði sjálv sín fløskupost í havið. Í brævinum hevði mamman, umframt navn og adressu skivað soleiðis: “Hi my is Petra. Im 2 years old. And I live in Klaksvik”.

Ja, tað skuldi skrivast í skundi og hesi vóru orðini.

27. februar í ár, ella knapt átta ár eftir, er fløskuposturin funnin í Farstad í Noregi.

finnararnir skiva nakað soleiðis: “Vit funnu hendan í Farstad, Hustadvika í Noregi í dag. Hann er frá Petru 2 ára gomul.

Vit ganga á einu gøtu til Nordneset fýrin, eg og tveir vinir. Vit búgva ikki her, men foreldur okkara hava eitt summarhús her.

Hetta er mín fyrsti fløskupostur (sum eg havi funnið). Vit eru næstan 37 ára gomul, men vit uppførdu okkum sum børn, tá vit funnu hendan, ha,ha. - Bestu heilsanir Ellen Rokstad, Marianne Skjegstad og Hilda Strand Høye.”

Fløskupostar finna væl vegin, næstan í kapping við Posta. Kristina í Króki Eliassen og Karl Jákup Elisasen eiga fýra døtrar, Katrina, Karin, Eyðbjørg og Petra. Allar hava verið á Føroya Sjómannadegi og hava tveitt fløskupostar út og allar hava fingið svar. Petra og tvær aðrar systrar hava fingið svar úr Noregi ímeðan Eyðbjørg fekk svar úr Svínoy.