Sólin skein oman og niðan, tá KÍ í dag spældi sín síðsta heimadyst í landskappingini áðrenn summarsteðgin. ÍF-liðið var sera skert í dag, har fýra leikbann vóru umframt, at toppskjúttin og málverjin sótu uttanfyri við skaðum. 

Vánaligt KÍ-avrik í fyrra hálvleiki

Helst hevur hetta skerda ÍF-liðið eisini sett seg mentalt hjá KÍ-hópinum, tí KÍ var ikki til at kenna í fyrra hálvleiki. Spælið hekk als ikki saman og mistøkini vóru mong, sum vit annars nærum ikki hava sæð hetta kappingarárið. KÍ hevði trupult við at skapa málmøguleikar, men beint áðrenn hálvleik skoraði KÍ eftir, at Boris Dosljak tilvildarliga kom at standa leysur. At KÍ-venjarin var illa nøgdur sást við, at Deni Pavlovic bleiv útskiftur í 40. minutti. 

Trý mál og tryggur sigur til endans

Í seinna hálvleiki bleiv avrikið hjá KÍ nakað frægari. KÍ fekk skorað trý mál afturat og tí var ongantíð nakar ivi um, hvør fór at vinna dystin. Men KÍ kom ongantíð uppá nakrar hæddir, sum vit sóu áðrenn landsliðssteðgin. KÍ hevur komandi fríggjakvøld útidyst móti B36, og tá verður neyðugt at lyfta seg, um upptaktin til Conference League skal vera góð, tí avrikið stóran part av dystinum móti ÍF var lítið sannførandi.