Til hátíðarhaldið á Syðradali í dag, á Alla Halganardagi, varð Jóannes Hansen høvuðsrøðari. Talu hansara fara vit seinni at geva tykkum her á nordlýsid. fo í morgin. Umframt sjálva høvuðstaluna, so bleiv minnisvarðin við jarðarstykkinu hann stendur á, givin Klaksvíkar Býráð í ogn. Meira um tað eisini í morgin.

Ongin sigst vera deyður á sjónum í farna ári. Tó kom ein nýggjur steinur upp við minnisvarðan á Syðradali. Navnið á Steininum er Páll Østerø, sum 29 ára gamalur datt oman á fjalli á Trøllanesi í 2018.

Mamma Páll, Maud Østerø nýtti høvi til í dag at takka Minnisvarðanevndini fyri at nevndin hevur givið steininum pláss her á Syðradali.

Maud Østerø segði:

Vegna okkum avvarðandi hjá Páll, vilja vit takka av hjarta minnisvarðanevndini á Syðradali, at tey hava tikið stig til, at ein steinur er settur til minnis um okkara son, beiggja og pápa. Steinin hjá Pál hevur Bárður sjálvur tikið Heimi í Bergi, sum er sunnanfyri Trøllanes.

12. juli 2018 var ein sera góður dagur, vit skuldu á fjall, so undarligt sum tað var, vórðu eingi børn í bygdini hendan lagnudagin. Veit ikki um Várharra vildi at tey ikki skuldu uppliva hettar, sum vit upplivdu hendan dag, tá Páll datt oman og doyði.

Langabbi Páll kom av Syðradali, pápi Martu ommu Páll. Hann gekk burtur við báti tá omma Páll Marta var 5 ára gomul. Lagnurnar eru og hava verið mangan harðar og tungar hjá nógvum.

Tað fer at vera gott hjá okkum øllum og Pállá dóttur, Hallu, at her er eitt minni á Syðradali, sjálvt um hann bleiv grivin á Eiði.

Til seinast, Filippibrævið 4. 5,6

Stúrið ongum fyri, nei, latið í øllum tað, sum tit ynskja,

koma fram fyri Gud í ákallan og bøn við tøkk.

So skal friður Guds, sum stígur upp um alt vit, varðveita hjørtu

og hugsanir tykkara í Kristi Jesusi.

Harrin signið tykkum og okkum øll.