Kongsstovan støkk upp matstað á Norðoyastevnu
Á Norðoyastevnu hevur Kongsstovan í Haraldssundi støkk upp matstað. Tað eru bóndahjúnini, Gunnhild og Kári, ið búgva í Kongsstovuni í Haraldssundi, sum fara at selja stevnubitar á Norðoyastevnu. Tey fara at halda til í hugnaligu hølunum, har kafé Fríða áður helt til. Á matarlepanum verður ymiskt av teirra egnu rávørum og øðrum stuttfluttum.
Vit fara millum annað at borðreiða við turrum kjøti, livrarætti, hvannum og rabarbum. Alt verður ikki avdúkað her – kom heldur á gátt og njót matin aftur við onkrum leskiligum at drekka, sigur Kári.
Vit vilja eisini skapa eitt stað, har fólk kunnu koma at njóta føroyskan mat, sum er framleiddur á burðardyggan hátt, og har framleiðarar og keyparar hittast, sigur Gunnhild.
Tey leggja aftrat, at tey vóna, at støkk upp matstovan verður væl vitjað, tí so hava tey kanska mót uppá at royna hetta aftur við øðrum rávørum, sum eru tongdar at árstíðunum.
Soleiðis verður opið á Nólsoyar Páls gøta 7:
Fríggjadag: kl. 17-22
Leygardag: kl. 12-22
Sunnudag: kl. 15-19