Steinsetingin fyri húsinum er um at vera liðug. Síðani skulu Kanjon stoypa grundina, meðan Eyðun Jacobsen saman við hjálparfólki reisa húsið. Leiðingar sum vatn, el og tele eru lagdar til húsið.

Á Eiðnum liggur nógvir posar av nevagróti, skervi og sandi, ið skal brúkast til ymiskar verkætlanir, sum skulu fremjast í summar.

Kanjon hevur flutt ymisk arbeiðsamboð, kranabilar, betonbilar, gravimaskinur o.a. út til Svínoyar, og í gjár var sandbátur við hópin av gróttilfari, skervi og sandi.

Nógvar uppgávur í Svínoy

Kanjon hevur nógvar ymiskar uppgávur úti í Svínoy, nú summarið stendur fyri durum. Teir skulu breiðka, hækka og longja kaiina á Víkini. Eisini skulu teir grava fyri grundum til felagshúsið hjá Bjarnafossi. Í løtuni grava teir út og steinseta fyri seyðahúsi hjá Jákup Mikkelsen.

Síðani skulu teir eisini gera eitt størri planeringsarbeiði við smáltstøðina. Teir hava nógva ymiska útgera har úti og fara at rigga eina blandistøð til úti við bátahylin.

Og tá ið teir eru har úti, stingst oftani ymiskt annað upp, sum teir hjálpa til við. Í gjárkvøldið hjálptu teir til við at strekkja ein háspenningskaðal.

So tað hendir nógv spennandi úti í Svínoy fyri tíðina. Seinni í summar verður svimjihylurin eisini umvældur og tettur, í fjør fekk vegurin niðan til hylin ymsar ábøtur, so betri slepst til.

Eisini eru onkur summarhús í gerð í Svínoy, og um summarið eru altíð nógv fólk, sum vitja afturá aftur til heim ella ættarbond síni. Eisini eru hópin at ferðafólki er at síggja.