Fíggjarmálaráðharrin: Skilagott at dagføra prísirnar hjá Bygdaleiðum
Prísirnir á olju og øðrum vørum eru hækkaðir nógv seinastu tíðina, og tí er skilagott eisini at hækka prísirnar hjá Bygdaleiðum, sigur Uni Rasmussen, landsstýrismaður í svari uppá fyrispurning.
Tað var fyri nøkrum vikum síðani, at Norðlýsið kundi siga frá, at Strandferðslan hevði í hyggju, at hækka prísirnar á bussleiðini millum Klaksvík og høvuðsstaðin.
Málið bleiv síaðni reist í Løgtinginum, tá Eyðgunn Samuelsen, tingkvinna, setti fram fyrispurning um málið. Nú er svarið komið. Í svarinum váttar landsstýrismaðurin, at prísirnir verða hækkaðir í næstum.
Vil betra sambandið har landfast er
Í svarinum verður lagt aftrat, at vit skulu vænta okkum broytingar á leiðunum millum norðurøkið og Suðurstreymoy, umvegis Eysturoyartunnilin. Ein partur av hesum broytingum verður at fáa fleiri snartúrar millum nevndu økir, samstundis sum tillagingar verða gjørdar á øðrum leiðum innanfyri galdandi sáttmálar.
Eisini verður arbeitt við at fáa betra sambandið millum norð-, suður-, og vesturøkið, umvegis Eysturoyartunnilin í sambandi viðat Sandoyartunnilin letur upp í 2023, sigur Uni Rasmussen, landsstýrismaður í fíggjarmálum