Lýsing
Lýsing
Lýsing
Í alt stilla 29 fólk upp fyri Sambandsflokkin, 16 menn og 13 kvinnur. | Mynd: Sambandsflokkurin.

Hetta vil Sambandsflokkurin á Løgtingi

SKRIVAÐ: Jóhann Lützen  |  23.11.2022 - 22:19 Politikkur Tíðindi

Sambandsflokkurin hevur eina drúgva valskrá til løgtingsvalið, og fyri Sambandsflokkin snýr hetta valið seg um tryggleika, sigur Bárður á Steig Nielsen, løgmaður, í introduktiónini. Komið verður inn á ótryggu støðuna í Europa, og hvussu neyðugt tað er við tryggleika í Føroyum, tá tað kemur til vælferð, búskap, verju – og mentan.

Verður lisið longri í valskránni, so kemur flokkurin, umframt vælferð og búskap, ið longu eru nevnd, inn á vinnu, burðardyggan vøkstur, altjóða samstarv, verjupolitikk, trygdarpolitikk, uttanríkispolitikk, veðurlag og umhvørvi. Málað verður sostatt við einum breiðum pensli at byrja við í valskránni.

S. 4 (og seinni eisini s. 7) í valskránni er ikki so væleydnað, tí hvítu bókstavirnir síggjast ikki væl á ljósu bakgrundini. Men við nakað av teldusnildi ber til at lesa kortini. Av heilt nýggjum vallyftum kunnu nevnast, at Sambandsflokkurin ætlar at stovna eina “Eventskrivstovu” og ein ráðgevingarstovn, “Export Faroe Islands”. Fyrrnevnda skal taka sær av samskipan og styrking av vinnuferðavinnu, meðan hin stovnurin skal veita fyritøkum ráðgeving um at koma inn á altjóða marknaðir.

Vørumerkið hjá Sambandsflokkinum øll 116 árini hevur verið ríkisfelagsskapurin við Danmark og Grønland, og hann fær eisini rúmd í valskránni. Flokkurin vil modernisera ríkisfelagsskapin, og skal eitt parlamentariskt samstarvsráð stovnast og ein arktiskur ambassadørur setast.

Á vælferðarøkinum er Sambandsflokkurin rættiliga ítøkiligur og vil eitt nú hækka útbúgvingarstuðulin við ítøkiligum upphæddum; 500 kr./mán. til miðnámsskúlanæmingar og 1.000 kr./mán. til lesandi á hægri útbúgvingum. Barnafrádrátturin skal hækkast við 2.000 krónum, barsilsgjaldið skal vaksa úr 25.000 kr. upp í 27.000 kr. beinanvegin og meira seinni, og sum nakað heilt nýtt ætlar flokkurin at seta í verk eina inflatiónstrygd, ið ger, at til ber at søkja um kr. 1.000 um mánaðin, so leingi prísvøksturin er hægri enn lønarvøksturin.

Á áðurnevndu s. 7 verður komið inn á umhvørvið burturav. Nógv verður gjørt burturúr grønum loysnum, bæði á veitarasíðuni og brúkarasíðuni. Sambandsflokkurin lovar eisini at arbeiða fyri eini loysn á drúgva trupulleikan um gongd í haga: Tað skal vera frítt fyri allar føroyingar at ganga í føroysku náttúruni, meðan vinnulig ferðavinna skal gjalda. Tó – ella harumframt – er ætlanin at íverkseta eina fráboðanarskyldu.

At enda ger Sambandsflokkurin eitt yvirlit yvir tær íløgur, sum skulu raðfestast frammarlaga. Ítøkiligar verkætlanir verða nevndar: Sjúkligahotell (hvar er tó ikki nevnt), Tjóðleikhús Føroya, Føroya Arena, Kampus (allarhelst til Fróðskaparsetrið) og sum óítøkiligar verkætlanir verða nevnd bústovnar, vardir bústaðir, SSL-ferjur og tunlar.

Til ber at taka alla valskránna í PDF-sniði niður á heimasíðuni hjá Sambandsflokkinum.

Lýsing
Seinastu tíðindini
SÍ á odda, men Fleyr ætlar meira
Summir samfelagsbólkar verða skattaðir a…
Allir føroyingar eiga at sleppa at njóta…
Trygg vælferð og rættvíst ískoyti til he…
Russara­sáttmálin
Jóla­trø­ini í KALSOY
Tjóðsangu­rin, felagsskapu­rin og íblástur…
Crescendo á fyrsta sinni á Skúlatrøð
Aftursvar til Tord J Niclasen
Øll skulu hava møguleika til varandi bús…
KREPPUHJÁLP TIL BREKØKIÐ - TALSFÓLK ER N…
Hví skulu vit melda okkum inn í alheims…
Tunnilin í Gøtudali
Lítil virðing fyri starvs­fólku­num elvir…
Hevur familjan tað gott, so hevur vinnan…
VALFUNDUR UM FÓLKA­SKÚLAN Í AULUNI Á NÁMS…
Hugleiðing um búskaparstøðuna - fyri at…
Faðir og barnið
Vit ungu eru framtíðin
Førleikameting, vaksnamannalæra og yrkis…