Luftrákið er enn sunnaneftir, men tað fer at broytast. Eitt hátrýst er við at mennast yvir Eysturgrønlandi, og tá er vanliga høgætt í Føroyum. Hetta verður í næstu viku. Men fyrst hvussu veðrið fer at vera í vikuskiftinum.

Seinnapartin í dag eru 5 til 10 m/s av suðuri, tað er skýggjað og regn so at siga kring alt landið. Hitin liggur um 10 til 12 stig.

Og soleiðis kunnu vit vænta, at veðrið fer at vera restina av hesum degi, tó at tað fer kølna nøkur stig í kvøld, niður í 7-8 stig.

Í nátt fer ættin allan vegin úr suðuri upp í norðan. Framvegis skýggjað og regn, men vindurin fer at minka niður í 3 til 8 m/s eina løtu, men veksur aftur upp í 5 til 10 m/s fram ímóti middegi.

Seinnapartin í morgin minkar vindurin aftur, í annaðkvøld er bert eitt lítið lot úr ymsum ættum. Samregnið, sum hevur verið í eitt samdøgur, fer at minka, og út á kvøldið er smáskýggjað og ælaveður.

Hitin í morgin fer at liggja um 8 til 10 stig um dagin. Um náttina niður í 6 stig.

Sunnunáttina er lítið lot úr ymsum ættum, smáskýggjað og ælaveður. Út á fyrrapartin er norðan, 3 til 8 m/s, skýggjað og ælaveður. Seinnapartin og restina av degnum er norðurætt, undir 5 m/s, smáskýggjað og fyri tað mesta turt.

Hitin sunnudagin 7 til 9 stig. Um náttina niður í 5 stig.