ASV og Bjørk Nolsøe Isaksen vinna 1. deild í donskum flogbólti
ASV, Aarhus Studenternes Volleyballforening, við Bjørk Nolsøe Isaksen á odda, vunnu leygardagin greiðan 3 – 0 heimasigur í Århus Gl. Stadionhal á IF Lyseng í donsku 1. deild. Settúrslitini vóru 25-23, 25-10, 25-12.
Harvið hevur ASV vunnið 1. deild vestur hóast 3 dystir eru eftir at leika. Tær hava 42 stig, meðan Fortuna Odense Volley og Aalborg Volleyball liggja ávíkavist nummar 2 og 3 bæði við 31 stigum.
Síðsta ár blivu ASV damurnar nummar 2, nøkur fá stig aftanfyri Ikast, ið vunnu og ryktu upp í bestu deildina.
Hettar er annað árið at Bjørk Nolsøe Isaksen spælir sum kantáleypari á liðnum.
Við skørpum hoppservum, hørðum smasjum og stabilum servimóttøkum og verjuspæli, er hon vorðin ein lyklaleikari á liðnum og er fleiri ferðir kosin dagsins leikari.
Fyrra partin á kappingarárinum, spældi Eva Winther Nagata nakrar dystir sum hevari á liðnum.
Í donsku 1. deild hjá kvinnunum eru 20 lið og hesi eru deild upp í tvær kappingar, 10 lið í 1. deild vestur og 10 lið í 1. deild eystur.
