At Landsstýrið á Viðareiði bar seg at sum eitt áarross í eini postalínsbúð gjørdi tað avgjørt ikki lættari fyri tinglimirnar í samgonguflokkunum. Andstøðutingfólkini trektu seg – ikki tí, tey høvdu neyvan ætlað at verið við kortini –, og alt fokusið í bæði almenningi og miðlum varð sett á skeivu tølini, ið borin vórðu fram á Viðareiði.

Uttanlandsnevndin hevur tó roynt at hildið høvdið kalt og innkallað nøkur viðkomandi umboð fyri vinnulívið í Føroyum. Tí, so løgið og órættvíst tað ljóðar, so fara føroysku tiltøkini ímóti Russlandi fyrst og fremst at raka tað føroyska vinnulívið, ið ongan lut eigur í innrásini í Ukraina.

Føroyska vinnan er sostatt ein Prügelknabe. Tá man ikki klárar at revsa Putin, ja, so má man revsa onkran annan, fyri at vísa á, at man ger okkurt. Bara okkurt. Valið er so fallið á at revsa tey í Føroyum, ið handla við russar og servisera teir. Stjórin á Pelagos var greiður, tá hann við stórum bókstavum nevndi fatalu fylgjurnar, sum tiltøkini fara at hava fyri hansara fyritøku, og fleiri aðrar fyritøkur eru í líknandi støðum.

Er hetta ikki at handla í óðum verkum? Vit vita framvegis ikki, um Landsstýrið í heila tikið hevur røttu tølini nú. Roynt hevur verið at fingið innlit í tað, men tað er noktað. Men óansæð hvat tølini siga, so er tað altíð vandamikið at lata vald frá fólkavalda Løgtinginum til starvssetta Landsstýrið. Harvið fáa vit ikki tað demokratiska kjakið ella orðaskiftið, sum týðandi avgerðir eiga at fáa, áðrenn tær verða settar í verk. 

Núverandi samgongutinglimir áttu at vitað hetta betur enn tey flestu. Seinasta valskeið høvdu tey øll peikifingurin á lofti, tá táverandi mentamálaráðharri, Jenis av Rana, noktaði at geva eini filmsverkætlan stuðul, hóast hon av fakfólki varð innstillað til stuðilin. Men Løgtingsins Umboðsmaður staðfesti, at tað hevði ráðharrin fullan rætt til, tí Løgtingið hevði sjálvt givið landsstýrismanninum, og landsstýrismanninum einsamøllum, heimildina.

Nú er Uttanlandsnevndin í ferð við at gera tað sama, nevniliga at flyta avgerðarrættin frá fólkavalda organinum til útinnandi valdið, og tað er ikki bara sum at siga tað at trekkja ta heimildina aftur. Og tað er torført fyri tingfólkini hjá samgonguni at gera tað, eisini um tað er neyðugt, tá tað eru teirra egnu formenn, ið manna útinnandi valdið.

Forkvinnan í Framsókn er sum fíggjarmálaráðfrúgv, sum vera man, eisini hart kroyst her. Vallyfti um lønarlyft og skattalætta skulu innfríast, men innan fáar dagar kann Løgtingið hava givið einum landsstýrismanni heimild at seta tiltøk í verk, sum kunna kosta tí føroyska vinnulívinum óteljandi milliónir; nakað sum sjálvandi eisini fer at merkja nógv færri milliónir til Landskassan, um hann velur at brúka hana.  

Tað er tí ein ovurhonds stór ábyrgd, ið hvílir á herðunum hjá samgongutinglimunum í hesum døgum. 2. viðgerð av uppskotinum um avmarkandi tiltøk kemur fyri á tingfundinum, ið byrjar kl. 10 mikudagin 14. juni.