“Ovasta  leiðsla er skipað  við  einum  forstjóra  og  tveimum  stjórum,  og  er  tað  forstjórin,  sum hevur seinasta orðið, tá talan er um tvístøður. Út yvir at vera stjórar í Sjúkrahúsverkinum, eru stjórarnir eisini  dagligir  stjórar  á  einstøku  sjúkrahúsunum. Stjórarnir  á  Klaksvíkar  sjúkrahúsi  og  Suðuroyar sjúkrahúsi vísa til forstjóran”. 

Soleiðis svaraði undanfarni landsstýrismaðurin í heilsumálum, Kaj Leo Holm Johannesen, løgtinginum í juni 2020. Hann legði aftrat, at hetta hevði verið støðan, síðani 2018, tá tað var ásett, at forstjórin hevur endaligu ábyrgdina av rakstrinum av Sjúkrahúsverkinum mótvegis Heilsumálaráðnum.  

Støðan er tann sama í 2023 sum í 2020. Og sum í 2018. Hetta er einki nýtt. 

Síðani 2018 hava vit verið ígjøgnum herviligastu heilsukreppuna í nýggjari tíð. Tá stóðu sjúkrahúsini øksl við øksl og samstarvaðu seg í gjøgnum kreppuna. Hugsi ikki, at eg sigi ov nógv, um eg sigi, at tað var ein styrki, at vit høvdu eina felags leiðslu fyri føroyska Sjúkrahúsverkið tá.