Løgtingsins Umboðsmaður hevur bæði givið Umhvørvismálaráðnum eina átalu og mælir sama ráði til at endurskoða málið um broytta byggisamtykt fyri havnarøki D í Tvøroyrar Kommunu. Áhugabólkurin Livilig kor á Tvøroyri klagaði um bæði málsviðgerðina hjá Tvøroyrar Kommunu og eftirfylgjandi góðkenningina frá Umhvørvismálaráðnum.

Áhugabólkurin fekk viðhald í, at Tvøroyrar Kommuna ikki kundi gera broytingarnar í byggisamtyktini, sum kommunan gjørdi, uttan at gera nýggja byggisamtykt. Men Umhvørvismálaráðið átti av røttum at havt kravt, at uppskotið átti at verið lagt fram til eftirlit av nýggjum, tá ið nýggjar avmarkandi ásetingar vórðu skoyttar upp í uppskotið, sigur Løgtingsins Umboðsmaður. 

Umboðsmaðurin mælir sostatt Umhvørvismálaráðnum til at endurskoða málið. Enn er ikki greitt, um Umhvørvismálaráðið fer at gera tað.

Alt álitið kann lesast her: https://www.lum.fo/alit-um-go%C3%B0kenning-fra-umhvoervismalara%C3%B0num-av-broyting-av-byggisamtykt-fyri-tvoeroyrar-kommunu