NORA stigtakari til kokkakapping í Klaksvík
Halla Nolsøe Poulsen, stjóri í NORA, sigur soleiðis um, hví tey settu verkætlanina Arctic Young Chef í gongd í Føroyum: – “Millum limalondini hava vit í langa tíð formerkt ein eftirspurning eftir hesum, nevniliga at pallseta kulinarisku scenurnar í Norðurlondum. Tað hevur verið ein tørvur á at lyfta hetta økið og fáa tað meira fram, og vit eru spent uppá, hvat fer at spyrjast burturúr”.
– “NORA hevur sum aðalmál at stimbra samstarv millum londini, og okkara høvuðsvirksemi er at stuðla verkætlanum. Vit síggja javnan, at onkur ikki søkir, hóast tað átti at verið eitt samstarv á økinum, og tí fóru vit bara í gongd sjálvi”, sigur Halla, og leggur afturat, at: – “Vónin er, at samstarvið, sum kemur burturúr, heldur fram aftaná”.
Spurd um hví valið fellur á Sjómannadagin, er svarið, at: – “Kokkaútbúgvingin liggur í Klaksvík, Sjómannadagurin hevur ein øgiliga stóran fólksligan uppbakning, og vit vilja gjarna, at so nógv sum gjørligt verða eksponerað fyri hesi kappingini og tiltakinum.”
Halla Nolsøe Poulsen endar við at siga, at ætlanin er, at tiltakið og kappingin bæði skulu varpa ljós á føroysku rávøruna og á vinnulívið, sum er við. Serliga áhugaverdar eru rávørur, sum ikki verða so nógv brúktar gerandis, og tað kann elva til avleitt virksemi við tað, at meira av rávøruni verður framleidd, og størri virksemi innan fyri matstovuvinnuna, bæði fyri verandi matstovur og komandi.
Halla Nolsøe Poulsen