- Tað eru ikki nógvir talarar, ið goyma sínar notatir, men tað hevur Óli á Grømma gjørt við góðari hjálp frá kontu sínari Judy. Hetta ger tað møguligt hjá okkum at savna allar tekstirnar og síðani geva tað út sum bók, so tað kann vera til signing fyri øll tey, sum kanska ikki hava hoyrt talurnar frá talarastólinum, sigur Jógvan Júst Rasmussen.

Fyrra bókin, sum kom út fyri góðum ári síðani, eitur "Orð úr orðinum" og er ein samanskriving av fleiri av teimum talum, ið Óli á Grømma hevur hildið, tá ið hann hevur verið í Føroyum.

Seinna bókin, ið kemur út um stutta tíð, ber heitið "Saman um samkomuna". Hendan bókin hugsavnar seg mest um talur, ið Óli á Grømma hevur hildið í Føroyum, har tænasta í samkomuni er í miðdepilinum.

Bøkurnar kunnu fáast í flest øllum bókahandlum í Føroyum, og tað er felagið Leirkeri, ið gevur bøkurnar út.