Klassiskur tónleikur er helst ikki tað, Klaksvík ella Norðoyggjar eru best kendar fyri. Men tað sær nú út til at taka eina nýggja vend, tí tann 28. juni verður Varpið karmur um eina World New Music Days 2024-konsert, sum tað eitur, har føroyska Ensemble Aldubáran fer at hava eina serstaka konsert í Varpinum.

Hetta er í samband við World New Music Days, sum International Society of Contemporary Music, ISCM, skipar fyri. ISCM er eitt altjóða netverk av limum úr umleið 50 londum, sum arbeiða fyri at fremja og framføra samtíðartónleik. Hetta kvøldið fara tey í Aldubáruni at framføra verk eftir fleiri ymisk altjóða tónaskøld, so sum Liu Qiqi úr Kina, Tryggva Þór Pétursson úr Íslandi, Jordan Nobles úr Canada og Kára Bæk úr Føroyum. Og so verður eisini eitt verk eftir lokala tónaskaldið Simonu Eivinsdóttir framført á fyrsta sinni. Simona sigur sjálv:

–  “Mín fyrsti íblástur til hetta verkið, bílagt til Aldubáruna, var at royna at fáa tey ymisku ljóðførini at trína fram og eisini spæla saman í ymiskum samansetingum. Eitt slag í senn leiðir hjartað, eins og tónleikurin, okkum ígjøgnum ymiskar tíðir í okkara lívi.”

Konsertin verður fríggjakvøldið 28. juni kl. 19 í Varpinum og kostar 125 krónur.

Keyp atgongumerki her.