Tað er tó ov tíðliga at staðfesta nakað enn, sigur Ingvar Ellinsgaard, sum tó váttar, at teir arbeiða fram ímóti at manna eitt 10-mannafar á Eiði. Hann var við at vinna FM við 6-mannafarinum Hvalinum í ár og tað eru hesir, sum ætla at manna 10-mannafarið. Ætlanin er at leiga ein bát, tí felagið eigur ikki 10-mannafar.

Hetta er tíðin, tá bátar verða mannaðir og ofta eru eisini bátar, sum um hesa tíðina á árinum eru nærum mannaðir, men sum tó ikki blíva endaliga mannaðir, tá regluligu venjingarnar byrja eftir ársskiftið. Tað frættist, at tað verður arbeitt við at manna fleiri 10-mannafør til 2025. Síðstu árini hava bara Klaksvíkingur og Norðingur luttikið hvørt ár og sum skilst er sannlíkt, at teir eisini verða við í 2025. Men søgur ganga um, at tað verður arbeitt við at manna Fuglfirðing, Eysturoying, Havnarbátin og Ormin Langa. So má tíðin vísa, um tað ber á mál.

Klaksvíkingur hevur vunnið FM fýra ár á rað, men tey síðstu trý árini hevur Norðingur á hvørjum ári vunnið onkran róður.