Ellinor Mercedis hevur longu, hóast sín unga aldur, verið virkin listakvinna í fleiri ár.

Eyðkendu og litríku málningar hennara, sum oftani ímynda sluppir, tó at tær eru langt fyri hennara tíð, hava hugtikið hana nógv.

Ellinor hevur dugað merkiliga væl at endurskapa løtumyndir frá eini farnari tíð til áhugaverdar og væl umtóktar málningar, settar í nútíðar samanhang ella høpi, sum siga bæði eldri og yngri hyggjarum nakað.

Eisini spæla fjallarøðir og kend landsløg væl við sum partur í summum av myndunum.

Seglhúsmenninir

Ellinor hevur altíð teknað nógv – heilt frá ungum av og hevur tekning, sum er grundhandverkið til málningalistina, verið hennara stóri áhugi.

Hans Erik Olsen var oldurabbi Ellinor og tí hava sluppirnar og mongu søgurnar saman við myndunum av sluppinum hjá Seglhúsmonnunum verið ein nátúrligur partur av uppvøkstri hennara. Her liggur helst eisini spírin til listaleiðina og -stílin hjá Ellinor Mercedis.

Støkkið inn á gólvið í Varpinum og verið við til eina spennandi søluframsýning, ið sum sagt letur upp sunnudagin 7. juli kl. 16.

Jóhanna C. Christiansen, forkvinna í Mentanarnevndini sigur nøkur orð, og Steintór Rasmussen, lærari og skald spælir nøkur løg.

Eisini verður boðin ein drekkamunnur við onkrum leskandi afturvið, har tað sjálvandi ber til at heilsa uppá ungu listakvinnuna.

Framsýningin er opin komandi dagarnar soleiðis:

Mánadag 8. juli til fríggjadag12. juli, frá kl. 17 - kl. 20

Øll eru hjartaliga vælkomin!