Beinir á Smukfest
Beinir og Smukfest bjóða til Unknown Location Tour Smukfest í Skanderborg er ein av stóru tónleikafestivalunum í Danmark.
Har hava tey eisini lagt merki til sermerktu konsertferðina hjá Beinir – sum hann kallaði Unknown Location Tour. Beinir bað sínar fjepparar senda uppskot um støð, har hann kundi spæla og setti síðan tvær konsertferðir saman. M.a. spældi hann á eini deild á Ríkissjúkrahúsinum, í einum motorsúkkluklubba og heima hjá fólki.
Nú bjóða Smukfest og Beinir 6 konsertir á festivalinum, sum verður í næstu viku. Hósdagin og fríggjadagin spælir Beinir á festivaløkinum, m.a. á Pianobar og NaturligHeden. Men festivalgestirnar sleppa at gera av, hvar seinasta konsertin kl. 14.00 fríggjadagin verður spæld. Teir kunnu senda uppskot til Beinir, og so velur ein vinnara úr rúgvuni.