Tveir teir størstu stoltleikarnir í Klaksvík vóru eisini teir fyrstu at brúka navnið ”Klaksvíkar” í nøvnum sínum. Teir eru Klaksvíkar Sjúkrahús frá 1898 og Klaksvíkar Ítróttarfelag frá 1904. Hesi nøvnini fingu tey sær longu áðrenn býarheitið var Klaksvík; nakað sum tað gjørdist í 1907, tá tær fýra bygdirnar Myrkjanoyri, Gerðar, Uppsalir og Vágur formliga løgdu saman til ein bý og eina kommunu.

Tað er onki at taka seg aftur í, at felagið hevur eina sera stolta søgu og mangan hevur gjørt býin stoltan. Til dømis sigraði KÍ á fyrstu Norðoyastevnuni í 1936, og felagið vann eisini fyrsta føroyameistaraheitið í fótbólti í 1942. Tiltikna ’66-liðið hevur eina sigursrøð, sum higartil ongantíð er tikin, og besta mansliðið hevur vunnið tilsamans 21 føroyameistaraheiti, sum er tað næstmesta í fremstu mansdeildini.

Felagið skarar uppaftur meira framúr, tá tað kemur til viðhaldsfólkini rundan um felagið. Fjepparaskarin hjá KÍ er tann størsti í landinum, og hóast úrslitini og áhugin ávirka hvønn annan, so hevur KÍ eisina eina trivaliga áskoðarafjøld, tá tað gongst illa. Illa gekst eitt nú í 2009, tá felagið noyddist ta tungu leiðina niður í næstbestu deildina, men við góðum stuðlum og áskoðarum hevur felagið svingað seg uppaftur hagar, tað er stuttligt at vera. Í fjør sló KÍ metið í europeiskum fótbólti og gjørdist tað fyrsta og higartil einasta at vera við í einum europeiskum bólkaspæli – ein luttøka, sum felagið júst í hesum døgum stríðist manniliga fyri at endurvinna.  

Umframt fremsta mansliðið hevur felagið eisini tað nógv mest vinnandi kvinnuliðið í landinum og bæði er og hevur verið slóðbrótandi á ungdómsøkinum við sínum vælsmurda akademii. Framtíðin sær sostatt bjørt út fyri stórthundrað ára gamla fótbóltsfelagið.

Við hesum reglum skal vera ynskt Klaksvíkar Ítróttarfelag hjartaliga tillukku við 120-ára føðingardegnum og blíðan byrð tey komandi hundrað og tjúgu árini! Somuleiðis verður av hjarta ynskt góða eydnu til lagnudystin í Helsinki komandi hóskvøld.