Lírin, er sum flestum kunnugt ungin hjá Skrápi. Á leið um somu tíð sum havhestaungarnir fara av reiðrinum, fara eisini Lírarnir úr holu síni. Í Klaksvík sæst vanliga ikki nógv til Líra og Skráp, men ókent er tað ikki. Jens Pauli Sólstein, ið fæst nógv við jørð og fjallgongu segði mær, at Líraurð er undir Háfjalli norður ímóti Nónhamri og niðan av Tanganum á Bóli, beint omanfyri gøtuna eftir vatnleiðingini út á Keldur, er Lírasteinur. So onki er at ivast í, at teir gomlu hava verið vitandi um Skráp og Líra undir Háfjalli, hóast vit  í dag, ikki vita nakað um líraveiðu her. Jens Pauli segði víðari, at hann hevði tríggjar ferðir tikið Líra upp hesa tíðina. Eins og Havhestaungin er Lírin so feitur tá hann fer úr reiðrinum, at hann hevur ilt við at flúgva og sleppur tí við hvørt ikki upp aftur, tá hann hevur lent.