Hósdagurin 12.09.2024

Vit skuldu øll møta á flogvøllinum kl.11.00. Fráferðin  var kl.13.10. Øll vóru so sera spent, og tað sást á børninum. Onkur hevði næstan onki sovið, og onkur hevði sindur ilt í búkinum. Men vit komu øll avstað í øllum góðum.

Lend í Edinburgh stóð guide’in frá Club Europe og tók í móti okkum. Vit blivu deild í tveir bussar, og leiðin gekk til Stirling. Nakrir av dreinginum høvdu sett seg væl fyri. Teir sótu á fremstu parket og høvdu beinleiðis samband við bussføraran. Skjótt hoyrdist útsagnir s.s.  “Thats cool”, “do you mean it” osfv. Eftir eina løtu helt bussførarin, at tíðin var komin at tendra mikrofonina, og fór hann at deila vitan, sum var viðkomandi fyri okkum øll í bussinum, millum annað sóust tvey stór rossahøvd, har lítil søga hoyrdi til.

Tá vit komu til Stirling eftir lítlan tíma í bussinum, vóru vit vælmóttikin á Stirling Hostel. Vit blivu deild í kømur av ymiskari stødd og høvdu frí í góðar tveir tímar, til nátturðin var.

Møguleikarnir í Stirling eru fleiri. Nøkur brúktu tíðina at vitja Stirling Castle og Stirling Old Town Jail, meðan tað eisni vóru nakrar garrvillar mammur, ið høvdu funnið ein Shopping Centur. Onkur megnaði at fylla posan, men aðrar blivu púra bimmelimm.

Her á vallaraheiminum eru góður møguleikar hjá bæði børnum og vaksnum at hugna sær, spæla spøl og læra hvønn annan at kenna.

Bæði børn og vaksin er spent til dagin í morgin, tá okkara fyrsta konsert verður her í Stirling.