Í Havn er Tjóðveldi longu í harðari kapping við Javnaðarflokkin um vinstrasinnaðu veljararnar og við Framsókn um teir høgrasinnaðu. Í sitandi løgtingsmanningini eru 5 av teimum 6 tingfólkunum havnarfólk – einans Eirikur í Jákupsstovu, sum er varalimur, hevur sítt jørðildi aðrastaðni. At ein flokkur fær heili 5 tingfólk úr sama øki, er óhoyrt fyri nakran flokk. Vit kenna onki annað dømi um tað sama.

Tað er tí ivasamt, hvussu nógv Bjørt Samuelsen sum havnarkvinna fær styrkt flokkin við har. Um flokkurin ikki longu er komin at mørkum har. Tað hevði eisini verið ein 1:1-útskifting við sitandi formann, sum er úr sama øki, og sostatt hevði tað ikki merkt stórvegis broyting. Tað kann sjálvandi bæði vera ein fyrimunur og ein vansi, men tað hevur ljóðað, at ætlanir eru um at styrkja og broyta flokkin, og har hevði Sirið Stenberg gjørt størri mun.

Vit skulu bara 25 ár – eitt ættarlið – aftur í tíð, so var Tjóðveldisflokkurin ein tann størsti flokkurin í Norðoyggjum, næststørsti flokkur í Suðuroy, størstur í Norðstreymoy, næststørstur í Eysturoy (!), næststørstur í Sandoy og var einans lítil í Vágum. Og alt hetta samstundis sum hann var størstur í Suðurstreymoy.

Tá var Tjóðveldi eitt tað sterkasta ”brand’ið” í at kalla øllum landinum. Í dag er hann einans sterkur í Suðurstreymoy og partvíst í Suðuroy, haðani 2 landsstýrisfólk floksins koma. Onki tjóðveldisfólk á tingi ella í landsstýri kemur úr Norðstreymoy, Eysturoy, Sandoy ella Vágum, og tað einsamalla umboðið úr Norðoyggjum er varafólk. Samstundis eru 5 tingfólk og 1 landsstýrisfólk hjá flokkinum úr Suðurstreymoy.

Hetta hevði Sirið Stenberg kunnað broytt til eitt komandi løgtingsval. Hon er politikari úr útjaðaranum í Føroyum, enntá tí partinum av útjaðaranum, sum er mest avskorin, verður sæð burtur frá smáu útoyggjunum.

Eykafloktstingið hjá Tjóðveldi byrjar á miðdegi leygardagin 2. november.