Gott veður í morgun og út á seinnapartin eisini. Ættin um norðan, men hevur hug at fara ímóti landnyrðingi. Vindferðin 3 til 8 m/s – lot til frískt lot. Sum sæst á myndini omanfyri, sum er tikin oman fyri Hvítanes og norðureftir á middegi í dag, so eru nakrir bøklar oman fyri oyggjarnar, meðan tað er klárt yvir firðum og sundum. So at siga einki avfall er komið niður í dag. Hitin liggur úr 1-2 stigum undir frostmarkinum og upp í eini 3-4 stig.

Í kvøld fer vindurin at minka niður um 5 m/s, og han fer at mala av ymsum ættum. Í aðrar mátar sama veður sum. Hitin í nátt fer kanska niður í minus 4 stig.  

So gott veður fáa vit ikki í morgin. Eitt sera djúpt lágtrýst er á veg ímóti okkum. Tað er enn nokkso langt burturi, men tað er á veg ímóti Skotlandi – sí myndina niðanfyri.

Lágtrýstið fer ikki bert at hava illveður við sær í Føroyum. Í Írlandi vænta tey sær eisini ringt veður – nógvan vind og nógv regn, eitt sindur minni av báðum enn í Føroyum. Írska veðurstovan hevur givið lágrýstinum navnið Bert.

Fylgissveinamynd klokkan 13 í dag. Bert sæst á myndini undir tí tjúkka hvíta og gráa skýlagnum.

Forsøgn fyri veðrið á middegi í morgin í einum vanligum isobarkorti. Roknað verður við, at trýstið miðjuni er lægst tá, 937 hPa. Hetta er næstan líka lágt sum tað lægsta sum nakrantíð er mált í Føroyum. Í januar 1993 vórðu mál 934 hPa.

Lágtrýstið Bert fer ikki at koma nógv nærri okkum, enn tað sum sæst á forsøgnini, sum er á myndini omanfyri. Men vit fara at leggja merki til tað. Fyrrapartin í morgin fer vindurin at veksa av landsynningi, upp í 8 til 13 m/s. Seinnapartin gongur hann upp í eystan fer at veksa upp í 10 til 15 m/s, og seint leygarkvøldið ella sunnunáttina fer hann at veksa av landnyrðingi upp í 18 til 23 m/s, onkra løtu 25 m/s – og hetta er miðalvindurin, vit tosa um! Saman við vindinum skulu vit rokna við nógvum avfalli allan sunnudagin, byrjandi um náttina. Avfallið er eitt bland av regni og vátakava.  

Gott vikuskifti.