Tað eru almennu Føroyar sum minna folk á, at tey skulu endiliga ikki halda, at man hevur loyvi at ganga í ov stórum skóm í Føroyum. Kemur tú heim at vitja tíni kæru til jóla, ja so stendur tollvaldið fyri tær, fyri at forða fyri, at tú hevur ov fínar jólapakkar.

Váti vøtturin

Ístaðin fyri at almennu Føroyar stóðu á flogvøllinum við eina stórum vælkomin heim skelti og ynsktu gleðilig jól – kanska við einari karamellu til børnini, so standa svartklæddir tollarar klárir við einum váttum vøtti at geva ferðafólki frammaná.

Hevði landskassin mist nógv við at strika jólagávumørkini? Hvat kostar eftirlitið í mun til tað, ið man fær inn?

Um tað er dýrari enn inntøkan, ja so spilla vit pening.

Lítla tvørliga eftirlitssamfelagið

Harafturat cementera vit ímyndina av Føroyum sum eitt lítið tvørligt eftirlitssamfelag, har man hevur loyvi til eitt sindur minni enn næstan øll hini í tí civiliseraða heiminum. Og nei, vit skulu ikki bara samanbera okkum við Danmark, sum hevur lítið at læra okkum, tá tað kemur til, hvat frælsi borgarin skal hava.

Er tað nakar sum heldur at tað tiltrekkir fólk, at talið av eftirlitsfulltrúum per íbúgva spolar uppeftir? Er tað nakar sum heldur at tollmørk, sum reelt verða trengri og trengri hvørt ár, gera nakað gott fyri Føroyar?

Politikarar mugu gera Føroyar rúmligari og lagaligari

Nú er tað ikki TAKS og tollvaldið sum áseta mørk. Tað gera politikarar. Vónandi gera teir Føroyar rúmligari og lagaligari við at broyta tollmørkini.

Man kundi t.d. havt eitt hámark, sum æt so nógv til persónliga nýtslu og gávur, sum man orkar at bera.

Tollvaldið eigur at verða sum heykar, tá tað kemur til rúsevni, men vælsignað verði, latið jólapakkar, luktilsi, sjokolátu og vín fáa frið.

Eg kann leggja afturat, at eg ferðaðist í mong ár heilt nógv kring allan heimin, tá eg arbeiddi uttanlands. Einasta staðið, har eg nakrantíð eri steðgaður í tollinum til kanningar, er í Føroyum.

Ben Arabo, Skattgjaldari