At seta sum treyt at tað einans eru tey, sum hava arbeitt í 50 ár eftir 16 ára aldur, sum kunnu fáa tíðartreytaða pensjón, er treyt, sum nærum einans ófaklærd starvsfólk lúka. Harafturat kemur, at upphæddin, sum hesi fólk kunnu fáa, einans skal samsvara við miðal fyritíðarpensjón. Hetta er upphædd, ið er alt ov lág. Miðal fyritíðarpensjón til støk er 155.751 kr. um árið eftir skatt og gjøld, og má tí metast at vera ein rein fátækrapensjón, ið er so lág, at hon er heilar 4.378 kr. lægri um árið enn føroyska fátækraváðamarkið. Fátækraváðamarkið er 161.129 kr. (ár 2022). Til sammetingar skal verða nevnt, at fólkapensjónineftir skatt og gjøld er 165.678 kr. um árið. Tíðartreytaða pensjónin er harvið uml. 10.000 kr. lægri enn fólkapensjón.

Í lógaruppskotinum verður sagt, at henda skipan er til teirra, ið vilja sleppa av arbeiðsmarknaðinum áðrenn fólkapensjónsaldur. Av viðmerkingunum til lógaruppskotið framgongur at tey, ið velja hesa loysn, ikki kunnu fáa persónliga viðbót eftir § 12 í pensjónslógini, vegna trong fíggjarlig kor, afturat pensjónini, soleiðis sum fyritíðar- og fólkapensjónistar kunnu. Tey, ið velja hesa loysn, hava sostatt ongan møguleika at søkja ískoyti, skuldu endarnir ikki rokkið saman hesi árini, tey eru tíðartreytaðir pensjónistar – heldur ikki, um fíggjarstøðan hjá teimum/húskinum óvæntað versnar.

Stórir starvsfólkabólkar koma als ikki undir skipanina um tíðartreytaða pensjón

Stórir starvsfólkabólkar á vælferðarøkinum so sum heimahjálpir, sjúkrahjálparar, hjálparfólk  v.fl., ið starvast innan heilsuverkið, á eldraøkinum, innan barnaansing v.m., og sum alt lívið hava havt strævið kropsligt arbeiði, fáa ikki nyttu av hesi skipan. Hesir starvsfólkabólkar hava í flestu førum tikið stuttar útbúgvingar uppá eitt til tvey ár og lúka tí ikki ásetta kravið um at hava arbeitt 50 ár á arbeiðsmarknaðinum eftir fylta 16 árinum fyri at fáa tíðartreytaða pensjón, tá tey gerast 66 ár. Aðrir starvsfólkabólkar so sum sjúkrarøktarfrøðingar, námsfrøðingar, fysioterapeutar v.fl., ið hava miðallangar útbúgvingar, fáa heldur ikki nýtt hesa skipan um tíðartreytaða pensjón.

 Áhugabólkur Pensjónista