Býráðsfundur er í kvøld kl. 17.30. Eitt av málunum er uppskot til fíggjarkarm 2026.

Inntøkurnar komandi ár eru mettar til 407,1 mió. kr. 

Raksturin er mettur til 318 mió.kr., ið er 14 mió. kr. hægri enn framskrivingin fyri 2025. Økingin stendst av lønar- og prísvøkstri. Avlopið frá rakstri er mett til 89,1 mió. kr.

Við rentustuðli (7,1 mió.kr.) og rentugjaldingum (12,2 mió.kr.) er avlopið áðrenn íløgur og avdráttir 69,8 mió. kr

Býráðið samtykti í februar 2023 at rinda 30 mió. kr. í lánsgjøldum næstu árini. Við 12,2 mió. kr. í rentum, verða avdráttirnir 17,8 mió. kr. og íløgurnar 52 mió. kr.

Í 2021 var raksturin 234 mió. kr. (uttan løgustuðl), og seinasta framrokningin fyri 2025 vísir, at raksturin verður 304 mió. kr. (uttan íløgustuðul). Hetta gevur ein miðalvøkstur upp á 6%.

Í uppskotinum er lutfallið millum rakstur og inntøkur 78,1% samanborðið við 79,7% í 2021. Leggja vit rentstuðul + rentuútreiðslur afturat rakstrinum, er lutfallið 82,9%, meðan tað í 2021 var 82,2%. Rentustuðul og rentugjaldingar byggja eisini á framrokningar við støði í rentunum september 2025.

Fíggjarnevndin mælir til at taka undir við einum inntøkukarmi á 407,1 mió.kr., og at miðað verður eftir einum lutfalli millum rakstur og inntøkur upp á 75 % fyri fíggjarætlanina 2026.

Við ársbyrjan var bankaskuldin 391,1 mió. kr. Lán upp á 40 mió.kr. var tikið í mai, og við avdráttum og rentum verður bankaskuldin við ársenda áleið 413 mió. kr.

Gjaldførið er avmarkað, og fyri at sleppa undan lántøku er neyðugt, at játtanirnar halda. Ein orsøk til hetta er, at felagsskatturin ikki verður útgoldin fyrr enn síðst í árinum, og tað setur krøv til gjaldførið.

Fíggjarætlanararbeiði

Tað eru tveir temadagar settir av til fíggjarætlanararbeiðið, har býráðslimir saman við umsiting viðgera rakstur og íløgur.

• Temadagur I verður 8. oktober, har raksturin verður viðgjørdur
• Temadagur II verður 6. november, tá íløgurnar verða gjøgnumgingnar

Fíggjarætlanin verður síðani viðgjørd í fíggjarnevndini 25. november og í býráðnum 27. november.

Býráðsfundurin kann stroymast beinleiðis á heimasíðuni hjá Klaksvíkar kommunu frá kl. 17.30

Les meira um býráðsskránna her.