Lágtrýst liggja vestan fyri Føroyar fyri tíðina og gera alt av sær. Brúgvaløg standa í flokk og rað og taka sítt tørn at leggja leiðina framvið. Mikudagin eru tey burtur, og mikudagin fáa vit hátrýstveður. Hósdagn og fríggjadagin fara lágtrýst at nærkast okkum sunnaneftir, og eisini tey fara at hava brúgvaløg við regni við sær.

Veðrið í vikuni – dag fyri dag:

Mánadagin:

Fyrrapartin er frískt lot til frískan vind, 5 til 10 m/s, og hann fer at liggja millum sunnan og landsynning. Loftið samdrigið og okkurt ælið. Seinnapartin og frameftir frískt lot til frískan vind av útsynningi, 5 til 10 m/s, samdrigið og regn ella ælaveður. Hitin 6 til 11 stig.

Týsdagin:

Frískt lot til frískan vind av útsynningi, 5 til 10 m/s, sum frá líður veksur til frískan vind upp í hvassan vind, 10 til 15 m/s. Skiftandi skýloft og ælaveður. Hitin 6 til 10 stig.

Mikudagin:

Frískt lot til frískan vind av útsynningi, 5 til 10 m/s, men spakuliga minkandi niður í lot av ymsum ættum, minni enn 5 m/s. Sólglottar og okkurt ælið, sum frá líður turt fyri tað mesta. Hitin 7 til 12 stig.

Hósdagin:

Frískt lot til frískan vind av landnyrðingi, 5 til 10 m/s, men spakuliga veksandi til frískan vind upp í hvassan vind, 10 til 15 m/s. Samdrigið og stundum regn ella ælaveður. Hitin 5 til 10 stig.

Fríggjadagin:

Fyrrapartin frískur vindur upp í hvassan vind av landnyrðingi, 10 til 15 m/s, seinni minkandi niður í lot til frískt lot av ymsum ættum, 3 til 8 m/s. Fyrst samdrigið og regn, men sum frá líður bert okkurt ælið og onkur sólglotti. Hitin 8 til 12 stig.