Mjølnir vann fimta sigurin á rað
Eftir at hava tapt fyri Fleyr í fyrsta dystinum í kappingini, hevur gingið sum eftir ánni hjá Mjølni, sum í gjár vann sín fimta sigur á rað, eftir at KÍF var sent suðuraftur til Kollafjarðar við 3-1 tapi í ferðaskjáttuni.
Mjølnir – KÍF 3-1 (25-13, 20-25, 25-14, 25-17)
Ein av trupulleikunum hjá KÍF vóru tær longu røðirnar av stigatapum, sum vóru heilt upp í 10 stig, og tá vinnur tú ikki flogbóltsdystir.
Soleiðis fór Mjølnir í einum frá 4-3 til 11-3 í fyrsta setti, og síðani frá 11-5 til 16-5, og tá vendist ikki aftur.
Eftir at KÍF hevði svarað aftur og vunnið annað sett 25-20, sá bjartari út hjá teimum, tá tær fóru framum 10-7, men eftir javnleik 12-12 vann Mjølnir 10! stig í einum háli, so støðan gjørdist 22-12, áðrenn Mjølnir vann settið 25-14.
Í fjórða setti fór Mjølnir skjótt fýra framum, og tann munurin bara vaks, til Mjølnir hevði vunnið 25-17.
Um eina viku verður toppdystur ímillum nr. 1 SÍ og nr. 2 Fleyr. Tá spælir Mjølnir ímóti Drátti og kann taka annaðplássið á stigatalvuni, um úrslitið lagar seg rætt.
Kl. 18 í dag møtast toppur og botnur á Giljanesi, tá Dráttur tekur ímóti SÍ.
Stigatalva í Hotel Djurhuus deildini