Í viðmerkingunum til uppskotið verður sagt, at føroyingar eru lutfalsliga tætt skyldir, og tí er títtleikin av fleiri deyðiligum arvaligum sjúkum hægri í Føroyum, enn hann er uttanlands.

- So langt so gott.

Men tað sum fekk meg at stúrsa við vóru orðini: “Uppskotið hevur við sær, at fólk við úrslitinum frá berarakanningini fáa møguleika at taka MEIRA UPPLÝSTAR AVGERÐIR VIÐVÍKJANDI MØGULIGUM BARNSBURÐI.”

Tað eru bara tveir mánaðir síðani løgtingið samtykti lógina um fría fosturtøku. Hon skal, við gildi frá 1. juli 2026, geva loyvi til fosturtøku til 12. viku uttan nakra kravda grundgeving. Harafturat skal bera til at fáa fosturtøku framda eftir 12. viku undir “serligum viðurskiftum”. Eitt av hesum serligu viðurskiftunum er “ættarbregði”. Tað skal vera loyvt at taka eitt fostur eftir 12. viku hóast talan kann vera um eitt púra frískt barn, tí mett verður, at tað MØGULIGA kann hava eina álvarsliga sjúku. Í viðmerkingunum til fosturtøkulógina stendur, at tað er ikki ein treyt, at talan altíð skal vera um ein nærliggjandi vanda fyri álvarsligari sjúku.

Og longu er eitt uppskot komið í Løgtingið um, at fólk skulu kunnu lata seg kanna, fyri at fáa greiðu á, um teirra barn MØGULIGA verður sjúkt. Hetta skal geva teimum møguleika fyri “meira upplýstum avgerðum viðvíkjandi møguligum barnsburði,” sum tað eitur so fínt.  

Ikki óvæntað sigur uppskotið um berarakanning, at lógin kemur í gildi 1. juli 2026 – sama dag sum lógin um fría fostru.

Helgi Abrahamsen
løgtingsmaður fyri Sambandsflokkin