Vit skulu rokna við at muga arbeiða, til vit vera í minsta lagi 69 ár. Tað hevur samgongan júst samtykt, at vit skulu.

Øll andstøðan atkvøddi ímóti, og tað gjørdi Liljan Weihe úr Tjóðveldi, ið situr í samgonguni, eisini. Men tað var ikki nóg mikið.

Fakfelagssamstarvið millum Heilsuhjálparafelag Føroya, Havnar Arbeiðskvinnufelag, Føroya Pedagogfelag, Føroya Lærarafelag, Felagið Føroyskir Sjúkrarøktarfrøðingar og Akademikarafelag Føroya boðaði frá, hvussu ótrygg tey føldu seg. Og felagið Verkafólk, sum er eitt paraplyfelag við Føroya Arbeiðarafelagi, Føroya Fiskimannafelagi, Havnar Arbeiðarafelagi, Havnar Arbeiðskvinnufelagi, Klaksvíkar Arbeiðskvinnufelagi og Klaksvíkar Arbeiðsmannafelagi, heitti inniliga á samgonguna um at fella uppskotið.

Samgongan lurtaði tó ikki og atkvøddi tí fyri at hækka pensjónsaldurin. Málið varð samtykt við 16 atkvøðum fyri og 15 ímóti. 2 tingfólk møttu ikki.

Ein viðgerð er eftir enn, men lítið røkist fyri, at nakað broytist til ta tíð.