Men fyri meg hevur tað eisini verið týdningarmikið, at menningin eisini sæst her norðuri.

Í Norðoyggjum eru fleiri ítøkilig stig tikin hesi árini.

Úr rúgvuni kann eg nevna at:

Tekniski skúli í Klaksvík hevur fingið nýggja ventilatiónsskipan, ið ger tað møguligt framhaldandi at geva lærlingum frálæru á timburdeildini, og arbeiðið við at um- og útbyggja skúlan við nýggjari aulu og betri umstøðum er komi væl áleiðis .

Á Klaksvíkar sjúkrahúsi verður starvsfólkabygningurin dagførdur, og nýggj móttøka gjørd til sjúkraflutningstænastuna. Samstundis eru høli gjørd til skannaran og tænastan styrkt, so fólk við prostatakrabba kunnu fáa kanningar og úrslitini av kanningini  skjótari enn áður.

Rótin er liðugt bygd og tikin í nýtslu. Tað eydnaðist at hækkað  stuðulin til leiguútreiðslur til skúlan, hetta merkir at  tað er gjørligt hjá øllum næmingum at búgva á næmingaheiminum. Soleiðis verður skúlin framhaldandi fyri øll ung, ið ynskja at søkja inn.

Nýggj farstøð er gjørd í Syðradali, og peningur til radiosamband er játtað til Viðareiðistunnilin. Tað ger ferðsluna tryggari – tí trygd er ikki ein luksus, men ein sjálvsøgd raðfesting.

Varpið hevur fingið 11 mió í stuðli hetta valskeiðið, og Játtanin til Íverksetarahúsið, Gloria og MEA er eisini økt nakað.

Eg eri errin av tí, sum er gjørt. Men arbeiðið er ikki liðugt.

Norðoyggjar skulu framvegis mennast og hava góðar tænastur – bæði á heilsuøkinum, útbúgvingarøkinum og í samferðsluni.

Fái eg møguleikan eftir valið, fari eg framvegis at arbeiða fyri Klaksvík og Norðoyggjum.

Eyðgunn Samuelsen

Valevni á Lista C