Mentamálaráðið klúgvast í tvey?
Tað frættist frá tingingunum um landsstýrissessin í mentamálum, at bæði Tjóðveldi og Framsókn vildu hava hann, og at løgmaður ikki megnar at skera ígjøgnum. Tí verður róð framundir, at flokkarnir fáa ein landsstýrissess í part.
Sum skilst verður neyðugt við bygnaðarbroytingum í Mentamálaráðnum, har aðalráðið verður býtt sundur í tvey, fyri at bæði Framsókn og Tjóðveldi kunnu fáa hvør sítt landsstýrisfólk. Eitt uppskot sum hevur verið frammi er, at undirvísingarmál skulu skipast undir Framsókn, meðan Søvn Landsins, Mentanargrunnurin, Fólkakirkjan o.a. fara til Tjóðveldi.
Seinasti framløgudagurin í Løgtinginum er 28. februar, so teir 2 nýggju mentamálaráðharrarnir náa ikki at gera nevnivert við lógarbroytingar, men fara fyrst og fremst at fyrisita og umsita saman við aðalstjóranum. Spurningurin er so, um neyðugt verður við nýggjum aðalstjóra eisini, ella um tann núverandi skal arbeiða fyri báðar mentamálaráðharrarnar.
Enn er tað ikki endaliga avgjørt, at Framsókn og Tjóðveldi býta mentamál sínámillum, men hetta er so eitt uppskot, sum hevur verið á borðinum, veit Norðlýsið frá keldum.