Onnur meira eym etisk mál hava sett dagsskránna í miðlingini um samgongusamráðingarnar. Men tá samgonguskjalið verður alment er vert at leggja til merkis, hvørjar loysnir samgongan hevur upp á nakrar av stóru búskaparligu avbjóðingunum í Føroyum framyvir. Í grein míni í farnu viku lýsti eg við støði í heystfrágreiðing Búskaparráðsins aktuellu búskaparstøðuna, har staðfest bleiv, at heiti búskapurin ikki hevur tørv á stimbran frá almennari síðu. Hesa vikuna vil eg eyðmerkja tríggjar av meira varandi avbjóðingunum fyri búskaparpolitikkin.

Tær tríggjar avbjóðingarnar eru álvarsamar

Á inntøkusíðini hjá landskassanum verður áhugavert at síggja, hvat borgarliga samgongan ætlar við tilfeingisinntøkunum, sum í ár muna heilt væl í landskassanum. Tí tað skulu nógvar inntøkur til at fíggja bólgnandi vælferðarútreiðlsurnar, sum eisini komandi árini væntast at vaksa nógv. Stóra bústaðartrotið kann lesast sum eitt úrslit av, at undanfarnu samgongurnar eydnaðust við at fáa vent fráflyting til fólkavøkstur, men framyvir kann bústaðartrotið skjótt køva vøkstrinum. Teir tríggir borgarligu flokkarnir hava tó verið rættiliga ymiskir á málið um loysnir upp á tann trupulleikan, sum vit skulu viðgera seinni.

Sambandið millum avbjóðingarnar

Hesar tríggjar avbjóðingarnar hanga óloysiliga saman. Inntøkurnar frá tilfeingisgjøldum er vaksnar frá ongum fyri fáum árum síðani til eina hálva milliard krónur í ár, samstundis er talið av eldri borgarum økt við 25% í sama tíðarskeiði, sum hevur økt vælferðarútreiðslurnar. Komandi tvey áratíggjuni veksur talið av eldri borgarum enn skjótari enn síðstu tíggju árini, har einasta veruliga haldføra loysnin uppá tí avbjóðingina er, at vit í enn størri mun fáa yngru ættarliðini at støðast í Føroyum. Til tess má bústaðartrotið loysast.

Meðan vit bíða eftir nýggja samgonguskjalinum, fari eg í dag at viðgera hesar tríggjar avbjóðingarnar fyri føroyska búskapin.